କଟକ: ଭାରତ ମସଲା ଓଡ଼ିଶା ଟି-୨୦ ଲିଗ୍–ସିଏମ୍ ଟ୍ରଫି ଅବସରରେ ମଙ୍ଗଳବାର ବାରବାଟୀ ଷ୍ଟାଡିୟମରେ ଓଡ଼ିଶା କ୍ରିକେଟ୍ ଆସୋସିଏସନ୍ (ଓସିଏ) ପକ୍ଷରୁ ଆୟୋଜିତ ମହିଳା ପ୍ରଦର୍ଶନୀ ମ୍ୟାଚ୍ରେ ଓସିଏ ମହିଳା ବ୍ଲୁ, ଓସିଏ ମହିଳା ଗ୍ରୀନ୍କୁ ୭ ୱିକେଟ୍ରେ ପରାସ୍ତ କରିଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଓସିଏ ମହିଳା ଗ୍ରୀନ୍ ୨୦ ଓଭରରେ ୭ ୱିକେଟ୍ ହରାଇ ୧୧୨ ରନ୍ ସଂଗ୍ରହ କରିଥିଲା। ଦଳ ଆରମ୍ଭରୁ ଚାପରେ ରହି ୧୦ ରନ୍ରେ ୩ଟି ୱିକେଟ୍ ହରାଇଥିଲା। ଏହାପରେ ତନ୍ମୟୀ ବେହେରା ଓ ସଙ୍ଗୀତା ଖଡ଼ିଆ ମିଶି ଦଳର ଇନିଂସ୍କୁ ସମ୍ଭାଳିଥିଲେ। ଉଭୟେ ଚତୁର୍ଥ ୱିକେଟ୍ ପାଇଁ ୩୫ ରନ୍ର ଭାଗୀଦାରି କରିଥିଲେ। ତନ୍ମୟୀ ବେହେରା ୧୫ଟି ବଲ୍ରୁ ୨୧ ରନ୍ କରି ଆଉଟ୍ ହୋଇଥିଲେ। ସଙ୍ଗୀତା ଖଡ଼ିଆ ଇନିଂସ୍କୁ ଆଗକୁ ନେଇଥିଲେ ମଧ୍ୟ ୩୩ଟି ବଲ୍ରୁ ୩୦ ରନ୍ କରି ଆଉଟ୍ ହୋଇଥିଲେ। ଏହାପରେ ମୋନାଲିଶା ରାଉତ ଓ ବିଜୟଲକ୍ଷ୍ମୀ ବେହେରା ଗୁରୁତ୍ୱପୂର୍ଣ୍ଣ ରନ୍ ଯୋଡ଼ି ଦଳକୁ ୧୦୦ ରନ୍ ପାର କରାଇଥିଲେ। ମୋନାଲିଶା ୨୮ଟି ବଲ୍ରୁ ୨୫ ରନ୍ କରିଥିବା ବେଳେ ବିଜୟଲକ୍ଷ୍ମୀ ୨୩ଟି ବଲ୍ରୁ ୧୭ ରନ୍ କରିଥିଲେ। ଓସିଏ ମହିଳା ବ୍ଲୁ ପକ୍ଷରୁ ଜିଏମ୍ ଅଲକନନ୍ଦା ଚମତ୍କାର ବୋଲିଂ କରି ୪ ଓଭରରେ ମାତ୍ର ୧୨ ରନ୍ ଦେଇ ୨ଟି ୱିକେଟ୍ ହାସଲ କରିଥିଲେ। ୧୧୩ ରନ୍ର ଲକ୍ଷ୍ୟର ପିଛା କରି ଓସିଏ ମହିଳା ବ୍ଲୁ ଦମଦାର ଆରମ୍ଭ କରିଥିଲା। ଅଲିପ୍ସା ବିଶ୍ୱାଳ ଓ ଶିଳ୍ପା ସ୍ୱାଇଁ ମିଶି ପ୍ରଥମ ୱିକେଟ୍ ପାଇଁ ୬୮ ରନ୍ର ଭାଗୀଦାରି କରିଥିଲେ। ପ୍ରଥମ ୧୦ ଓଭରରେ ଉଭୟେ ଦଳର ସ୍କୋରକୁ ଦ୍ରୁତ ଗତିରେ ଆଗକୁ ନେଇଥିଲେ। ଶିଳ୍ପା ସ୍ୱାଇଁ ୩୧ଟି ବଲ୍ରୁ ୨୬ ରନ୍ କରି ଆଉଟ୍ ହୋଇଥିଲେ। ପରେ ବ୍ଲୁ ଦଳ ଆଉ ଦୁଇଟି ୱିକେଟ୍ ହରାଇଥିଲେ ମଧ୍ୟ ମ୍ୟାଚ୍ ଉପରେ ନିଜର ନିୟନ୍ତ୍ରଣ ବଜାୟ ରଖିଥିଲା। ଶେଷରେ ମ୍ୟାଚ୍ର ଅନ୍ତିମ ଓଭରରେ ବ୍ଲୁ ବିଜୟ ଲକ୍ଷ୍ୟ ହାସଲ କରିଥିଲା। ପ୍ରଜ୍ଞାନ ପି. ମହାନ୍ତି ୩୨ଟି ବଲ୍ରୁ ୨୭ ରନ୍ କରି ଅପରାଜିତ ରହି ଦଳକୁ ବିଜୟୀ କରାଇଥିଲେ। ମ୍ୟାଚ୍ ପରେ ଓସିଏ ମହିଳା ବ୍ଲୁର ଅଧିନାୟକ ସୁଭ୍ରା ସ୍ୱାଇଁ କହିଛନ୍ତି, “ନିଶ୍ଚିତ ଭାବେ ମ୍ୟାଚ୍ ଆମ ଯୋଜନା ଅନୁଯାୟୀ ହୋଇଛି। ଦଳର ସମସ୍ତ ସଦସ୍ୟ ନିଜର ଶ୍ରେଷ୍ଠ ପ୍ରଦର୍ଶନ ଦେଇଛନ୍ତି ଏବଂ ନିଜ ନିଜ ଦାୟିତ୍ୱକୁ ଠିକ୍ ଭାବେ ତୁଲାଇଛନ୍ତି। ଏହା ଏକ ସମ୍ପୂର୍ଣ୍ଣ ଦଳଗତ ପ୍ରୟାସ ଥିଲା।” ସେ ମହିଳା କ୍ରିକେଟରମାନଙ୍କୁ ଓସିଏ ପକ୍ଷରୁ ମିଳିଥିବା ଏହି ମଞ୍ଚକୁ ନେଇ ଖୁସି ପ୍ରକାଶ କରିବା ସହ ଭବିଷ୍ୟତରେ ଏଭଳି ଅଧିକ ସୁଯୋଗ ମିଳିବ ବୋଲି ଆଶା ପ୍ରକାଶ କରିଥିଲେ। ସେ କହିଥିଲେ, “ଏଭଳି ଏକ ମଞ୍ଚ ପାଇଥିବାରୁ ଆମେ ବହୁତ କୃତଜ୍ଞ। ଭବିଷ୍ୟତରେ ଆମକୁ ଆହୁରି ଅଧିକ ସୁଯୋଗ ମିଳୁ ବୋଲି ଆମେ ଚାହୁଁଛୁ। ଯଦିଓ ଏହା ଏକ ପ୍ରଦର୍ଶନୀ ମ୍ୟାଚ୍ ଥିଲା, ଆମର ଉଦ୍ଦେଶ୍ୟ ଏହାକୁ ଏକ ସମ୍ପୂର୍ଣ୍ଣ ପ୍ରତିଯୋଗିତାମୂଳକ ମ୍ୟାଚ୍ ଭଳି ଖେଳିବା ଥିଲା। ଆମେ ଏହାକୁ ପ୍ରଦର୍ଶନୀ ମ୍ୟାଚ୍ ବୋଲି ଭାବିନଥିଲୁ।” ଚମତ୍କାର ବୋଲିଂ ପାଇଁ ଜିଏମ୍ ଅଲକନନ୍ଦାଙ୍କୁ ‘ପ୍ଲେୟର ଅଫ୍ ଦ ମ୍ୟାଚ୍’ ଭାବେ ଚୟନ କରାଯାଇଥିଲା। ଭାରତ ମସଲାର ଡାଇରେକ୍ଟର ଶ୍ରୀମନ୍ତ ପଣ୍ଡା ତାଙ୍କୁ ପ୍ଲେୟର ଅଫ୍ ଦ ମ୍ୟାଚ୍ ପୁରସ୍କାର ପ୍ରଦାନ କରିଥିଲେ।
ବାରବାଟୀରେ ଓଡ଼ିଶା ଟି-୨୦ ଲିଗ୍ ପ୍ରଦର୍ଶନୀ ମ୍ୟାଚ୍: ଓସିଏ ମହିଳା ବ୍ଲୁର ୭ ୱିକେଟ୍ରେ ବିଜୟ
Typography
- Smaller Small Medium Big Bigger
- Default Helvetica Segoe Georgia Times
- Reading Mode
powered by social2s

