ଯାଜପୁର: ଯାଜପୁରର ପ୍ରସିଦ୍ଧ ବାରୁଣୀ ସ୍ନାନ ବାରୁଣୀରେ ବୁଡ଼ ପକାଇବାକୁ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଛି। ବୈତରଣୀ ନଦୀର ଦଶାଶ୍ବମେଧ ଘାଟରେ ବୁଡ଼ ପାଇଁ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଛି। ଋଷିକୁଲ୍ୟା ଓ ବଡ଼ ନଦୀ ସଙ୍ଗମ ସ୍ଥଳରେ ବୁଡ଼ ପକାଉଥାନ୍ତି ଲୋକେ। ପିତୃପୁରୁଷଙ୍କ ଉଦ୍ଦେଶ୍ୟରେ ପିଣ୍ଡଦାନ ସହ ଅସ୍ଥି ବିସର୍ଜନ କରାଯାଉଛି।

କଳାହାଣ୍ଡି: କଳାହାଣ୍ଡି ଜିଲ୍ଲା ନର୍ଲା ବ୍ଲକ୍ ଅନ୍ତର୍ଗତ ନର୍ଲା ସହର ର ଉପର ପଡ଼ା ଉଚ୍ଚ ପ୍ରାଥମିକ ବିଦ୍ୟାଳୟ ରେ ମହା ସମାରୋହ ରେ ଚଳିତ ବର୍ଷର ବାର୍ଷିକ ଉତ୍ସବ ଅନୁଷ୍ଠିତ ହୋଇ ଯାଇଛି। ଉକ୍ତ ବିଦ୍ୟାଳୟ ର ପ୍ରଧାନ ଶିକ୍ଷକ ଶ୍ରୀଯୁକ୍ତ ଅର୍ଜୁନ କୁମାର୍ ବାଗ୍ ଙ୍କ ତତ୍ତ୍ବାବଧାନରେ ଆୟୋଜିତ ଉକ୍ତ କାର୍ଯ୍ୟକ୍ରମ ରେ ବିଦ୍ୟାଳୟ ର ପରିଚାଳନା କମିଟି ର ସଭ୍ୟ ସଭ୍ୟା, ଶିକ୍ଷକ, ଶିକ୍ଷୟିତ୍ରୀ, ଛାତ୍ର ଛାତ୍ରୀ, ଅବିଭାବକ ଓ ଗ୍ରାମବାସୀ ଙ୍କୁ ନେଇ ସ୍ଥାନୀୟ ବୁଢ଼ାରଜା ମନ୍ଦିର ରୁ ଏକ ମଶାଲ ଶୋଭାଯାତ୍ରା ରେ ନର୍ଲା ସହର ପରିକ୍ରମା କରି ସ୍କୁଲ୍ ପରିସର ର ସଭା ମଣ୍ଡପ ରେ ମଶାଲ ସ୍ଥାପନ କରିଥିଲେ। ଉକ୍ତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ନର୍ଲା ସରପଞ୍ଚ ଶ୍ରୀମତୀ ତନୁଜା ହରପାଳ ଯୋଗ ଦେଇ ଥୂବା ବେଳେ ସମ୍ମାନିତ ଅତିଥୁ ଭାବେ ପୂର୍ବତନ ପ୍ରଧାନ ଶିକ୍ଷୟିତ୍ରୀ ଶ୍ରୀମତୀ କ୍ରିଷ୍ଣା ହୋତା, ଶ୍ରୀଯୁକ୍ତ ପର୍ଶୁରାମ ଦାସ୍, ଶ୍ରୀଯୁକ୍ତ ନିର୍ମଳ ବାରିକ୍, ଶ୍ରୀଯୁକ୍ତ ନେପାଳ ସାହୁ C R C C ଶ୍ରୀଯୁକ୍ତ କ୍ଷୀରସିନ୍ଧୁ ସାହୁ, ନୀଳକଣ୍ଠ ମାଝୀ ପ୍ରମୁଖ ଉପସ୍ଥିତ ରହି ମଞ୍ଛାସିନ ଥିଲେ। ଉକ୍ତ କାର୍ଯ୍ୟକ୍ରମ ରେ ବିଦ୍ୟାଳୟ ର ପ୍ରଥମ ମହିଳା ପ୍ରଧାନ ଶିକ୍ଷୟିତ୍ରୀ ଶ୍ରୀମତୀ ରଶ୍ମିମୟୀ ମିଶ୍ର ଙ୍କୁ ସମ୍ମାନିତ କରାଯାଇଥିଲା । ସଂଜୀବ କୁମାର ବିଶି, ଭୂମିସିଂ ଠାକୁର୍,ସୁଧୀର ନାଏକ ଙ୍କ ସହଯୋଗ ରେ ଆୟୋଜିତ ଉକ୍ତ କାର୍ଯ୍ୟକ୍ରମରେ ଛାତ୍ର ଛାତ୍ରୀ ଙ୍କ କୃତିତ୍ବ ପାଇଁ ବିଭିନ୍ନ ପ୍ରତିଯୋଗିତା କରି କୃତି ପ୍ରତିଯୋଗୀ ଙ୍କୁ ମାନପ‌ତ୍ର ଓ ଟ୍ରଫି, ମେଡାଲ୍ (ଗୋଲ୍ଡ, ବ୍ରୋଞ୍ଚ୍)ପଦକ ପ୍ରଦାନ କରାଯାଇ ଥିଲା ।କୁମାରୀ ଝରଣା ପ୍ରଧାନୀ ସୁନ୍ଦର ଭାବେ ମଞ୍ଚ ପରିଚାଳନା କରିଥିବା ବେଳେ ବିଭିନ୍ନ ରଙ୍ଗା ରଙ୍ଗ ସାଂସ୍କୃତିକ କାର୍ଯ୍ୟକ୍ରମ ମଧ୍ଯ ଅନୁଷ୍ଠିତ ହୋଇଥିଲା । ପୁରାତନ ଛାତ୍ର ଛାତ୍ରୀ ଙ୍କୁ ମଧ୍ଯ ପ୍ରଶଂସା ପତ୍ର ସହିତ ଟ୍ରଫି ପ୍ରଦାନ କରି ସମ୍ମାନିତ କରାଯାଇଥିଲା। ବିଦ୍ୟାଳୟ ର ସହ ଶିକ୍ଷକ ଶ୍ରୀଯୁକ୍ତ ରବୀନ୍ଦ୍ର କୁମାର୍ ସାହୁ ବିଦ୍ୟାଳୟ ର ଇତିହାସ ଟିପ୍ପଣୀ ପଢ଼ି ଶୁଣାଇ ଥିଲେ ଏବଂ ସଭା ଶେଷରେ ପ୍ରଧାନ ଶିକ୍ଷକ ଶ୍ରୀଯୁକ୍ତ ଅର୍ଜୁନ କୁମାର୍ ବାଗ୍ ଧନ୍ୟବାଦ୍ ଅର୍ପଣ କରିଥିଲେ । କଳାହାଣ୍ଡି ରୁ କବିରାଜ ଦୁର୍ଗାଙ୍କ ରିପୋର୍ଟ।

ଭୁବନେଶ୍ୱର: କେନ୍ଦୁପତ୍ର ହିତାଧିକାରୀ ମାନଙ୍କ କଲ୍ୟାଣ ପାଇଁ, ଆମ ସରକାର, ୨୦୨୪ କେନ୍ଦୁପତ୍ର ଶସ୍ୟ ବର୍ଷ ପାଇଁ ୮,୫୯,୪୪୯ ଜଣ କେନ୍ଦୁପତ୍ର ତୋଳାଳି ମାନଙ୍କ ପାଇଁ ଶତକଡା ୨୫ ହାରରେ ୫୨.୬୩ କୋଟି ଟଙ୍କ। ଲାଭାଂଶ ପ୍ରଦାନ କରିବାପାଇଁ ଘୋଷଣା କରିଛନ୍ତି। ୮,୫୯,୪୪୯ ଜଣ ତୋଳାଳୀଙ୍କ ମଧ୍ୟରୁ ୮୩.୯୨% ମହିଳା ଅଟନ୍ତି | ସେହିପରି, ୨୦,୫୦୨ ଜଣ କେନ୍ଦୁପତ୍ର ବନ୍ଧେଇ ଶ୍ରମିକମାନଙ୍କୁ ଶତକଡା ୫ ହାରରେ ୧.୯୪ କୋଟି ଟଙ୍କା ପ୍ରୋତ୍ସାହନ ରାଶି ଏବଂ ୧୬,୭୫୪ ଜଣ କେନ୍ଦୁପତ୍ର ସାମୟିକ କର୍ମଚାରୀମାନଙ୍କୁ ଶତକଡା ୫ ହାରରେ ୪.୯୯ କୋଟି ଟଙ୍କା ପ୍ରୋତ୍ସାହନ ରାଶି ପ୍ରଦାନ କରିବାପାଇଁ ଆମ ସରକାର ଘୋଷଣା କରିଛନ୍ତି। ଉପରୋକ୍ତ ଲାଭାଂଶକୁ ହିତାଧିକାରୀଙ୍କ ବ୍ୟାଙ୍କ ଖାତାକୁ ସିଧାସଳଖ (ଡ଼ିବିଟି) ମାଧ୍ୟମରେ ପ୍ରଦାନ କରାଯାଉଅଛି। ମୁଖ୍ୟମନ୍ତ୍ରୀ କେନ୍ଦୁପତ୍ର ତୋଳାଳି ଯୋଜନାର ସଫଳ ରୂପାୟନ ପାଇଁ ୨o୨୪-୨୫ ଆର୍ଥିକ ବର୍ଷରେ “ମୁଖ୍ୟମନ୍ତ୍ରୀ କେନ୍ଦୁପତ୍ର କଲ୍ୟାଣ ପାଣ୍ଠି” ମାଧ୍ୟମରେ ୫୦.୦୦ କୋଟି ଟଙ୍କାର ଅର୍ଥ ବ୍ୟବସ୍ଥା କରାଯାଇଅଛି।

ଭୁବନେଶ୍ୱର: ଓଡ଼ିଶା ସରକାରଙ୍କ ଅନ୍ୟତମ ଗୁରୁତ୍ୱପୂର୍ଣ୍ଣ ବିଭାଗ ହେଉଛି ଗୃହ ବିଭାଗ । ଜନସାଧାରଣଙ୍କ ଧନଜୀବନ ସୁରକ୍ଷା ଓ ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ କରିବା ଏବଂ ସମାଜରେ ସୁରକ୍ଷିତ ବାତାବରଣ ପ୍ରଦାନରେ ଗୃହ ବିଭାଗ ପ୍ରମୁଖ ଭୂମିକା ଗ୍ରହଣ କରିଥାଏ । ଆଜି ସେହି ବିଭାଗର ଖର୍ଚ୍ଚ ଦାବି ଉପସ୍ଥାପନ କରିବା ଅବସରରେ ମୁଁ ଏହି ପବିତ୍ର ଗୃହକୁ ଅବଗତ କରିବାକୁ ଚାହେଁ ଯେ, ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ମୋଟାମୋଟି ଭାବେ ଶାନ୍ତିପୂର୍ଣ୍ଣ ଅଛି । ବିଭିନ୍ନ ସମ୍ପ୍ରଦାୟ ମଧ୍ୟରେ ସାମ୍ପ୍ରଦାୟିକ ସଦଭାବ ବଜାୟ ରହିଛି । ସମୟୋପଯୋଗୀ ଗୁଇନ୍ଦା ତଥ୍ୟ ଏବଂ ପୋଲିସର ଆଗୁଆ ଓ ଦୃଢ କାର୍ଯ୍ୟାନୁଷ୍ଠାନ ଫଳରେ କୌଣସି ଗୁରୁତ୍ଵପୂର୍ଣ୍ଣ ଆଇନ ଶୃଙ୍ଖଳା ପରିସ୍ଥିତି ଉପୁଜି ନାହିଁ । ମୁଁ ଏଠାରେ ଉଲ୍ଲେଖ କରିବାକୁ ଚାହେଁ ଯେ, ପୋଲିସର ସୁବନ୍ଦୋବସ୍ତ ଯୋଗୁଁ ୨୦୨୪ ମସିହା ଜୁଲାଇ ମାସରେ ଅନୁଷ୍ଠିତ ହୋଇଥିବା ମହାପ୍ରଭୁ ଶ୍ରୀ ଜଗନ୍ନାଥଙ୍କ ରଥଯାତ୍ରା, ବାହୁଡା ଯାତ୍ରା, ସୁନାବେଶ ଏବଂ ନଭେମ୍ବର ମାସରେ ଅନୁଷ୍ଠିତ ହୋଇଥିବା ଐତିହାସିକ ବାଲିଯାତ୍ରା ଶାନ୍ତି ଶୃଙ୍ଖଳାର ସହିତ ସମାହିତ ହୋଇଥିଲା । ସେହିପରି ଗତବର୍ଷ ନଭେମ୍ବର ମାସ ୨୯ ତାରିଖରୁ ଡିସେମ୍ବର ମାସ ୦୧ ତାରିଖ ପର୍ଯ୍ୟନ୍ତ ଭୁବନେଶ୍ବରଠାରେ ସର୍ବଭାରତୀୟ ପୋଲିସ ମହାନିର୍ଦ୍ଦେଶକ/ଆରକ୍ଷୀ ନିର୍ଦ୍ଦେଶକ ସମ୍ମିଳନୀ, ଡିସେମ୍ବର ୦୩ ରୁ ୦୭ ତାରିଖ ପର୍ଯ୍ୟନ୍ତ ପୁରୀ ବେଳାଭୂମିରେ ଅନୁଷ୍ଠିତ ହୋଇଥିବା ଭାରତୀୟ ନୌସେନା ଦିବସ ଭଳି ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମକୁ ମଧ୍ୟ ଶୃଙ୍ଖଳିତ ଭାବେ ଆୟୋଜନ କରାଯାଇଥିଲା। ଚଳିତବର୍ଷ ଜାନୁଆରୀ ମାସରେ ଭୁବନେଶ୍ଵରର ଜନତା ମଇଦାନ ଠାରେ “୧୮ତମ ପ୍ରବାସୀ ଭାରତୀୟ ଦିବସ” ଅନୁଷ୍ଠିତ ହୋଇଥିଲା। ଯେଉଁଥିରେ ଭାରତର ମହାମହିମ ରାଷ୍ଟ୍ରପତି, ମାନ୍ୟବର ପ୍ରଧାନମନ୍ତ୍ରୀ, ମାନ୍ୟବର ବୈଦେଶିକ ମନ୍ତ୍ରୀଙ୍କ ସମେତ ଅନେକ ମାନ୍ୟଗଣ୍ୟ ବ୍ୟକ୍ତି ଏବଂ ପୃଥିବୀର କୋଣ ଅନୁକୋଣରୁ ବହୁ ସଂଖ୍ୟକ ପ୍ରବାସୀ ଭାରତୀୟ ଯୋଗଦେଇଥିଲେ । ପୋଲିସର ସୁବନ୍ଦୋବସ୍ତ ଯୋଗୁଁ ଏହି ପ୍ରବାସୀ ଭାରତୀୟ ଦିବସ ଶାନ୍ତିଶୃଙ୍ଖଳାର ସହିତ ସମାହିତ ହୋଇଥିଲା। ଏହାସହ ଜାନୁଆରୀ ମାସରେ ଭୁବନେଶ୍ଵର ଜନତା ମଇଦାନ ଠାରେ “ଉତ୍କର୍ଷ ଓଡିଶା – ୨୦୨୫” ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମରେ ମାନ୍ୟବର ପ୍ରଧାନମନ୍ତ୍ରୀଙ୍କ ସମେତ ଦେଶ ବିଦେଶର ବହୁ ଶିଳ୍ପପତି ଏବଂ ବିଶିଷ୍ଟ ବ୍ୟକ୍ତିବିଶେଷ ଯୋଗ ଦେଇଥିଲେ। ପୋଲିସର ସୁବନ୍ଦୋବସ୍ତ ଯୋଗୁ ଏହା ଶାନ୍ତି ଶୃଙ୍ଖଳାର ସହ ଅନୁଷ୍ଠିତ ହୋଇଥିଲା। ଦୀର୍ଘବର୍ଷର ବ୍ୟବଧାନ ପରେ ଚଳିତ ବର୍ଷ ଫେବୃଆରୀ ୦୯ ତାରିଖରେ ବାରବାଟୀ ଷ୍ଟାଡିୟମ, କଟକ ଠାରେ ବହୁ ପ୍ରତୀକ୍ଷିତ ଭାରତ ଏବଂ ଇଂଲଣ୍ଡ ମଧ୍ୟରେ ଏକଦିବସୀୟ କ୍ରିକେଟ ମ୍ୟାଚ ଅନୁଷ୍ଠିତ ହୋଇଥିଲା। ଏହି ମ୍ୟାଚର ଆୟୋଜନ ଏବଂ ସୁପରିଚାଳନାରେ ପୋଲିସ ପ୍ରମୁଖ ଭୂମିକା ଗ୍ରହଣ କରିଥିଲା । ଶ୍ରମିକ ଧର୍ମଘଟ ଓ ବିଭିନ୍ନ କର୍ମଚାରୀ ସଂଗଠନ ଦ୍ଵାରା କରାଯାଇଥିବା ଆନ୍ଦୋଳନ ଗୁଡିକ ପୋଲିସର ସମୟୋଚିତ ଏବଂ ସତର୍କତାମୂଳକ ପଦକ୍ଷେପ ଯୋଗୁଁ ଶାନ୍ତିପୂର୍ଣ୍ଣ ଭାବେ ସମାହିତ ହୋଇଛି । ଚଳିତ ବର୍ଷ ଅଦ୍ୟାବଧି ରାଜ୍ୟରେ କୌଣସି ଆତଙ୍କବାଦୀ କାର୍ଯ୍ୟକଳାପ ଘଟିନାହିଁ । ମାଓବାଦୀ ଦମନ କ୍ଷେତ୍ରରେ ଓଡ଼ିଶା ପୋଲିସ ଉଲ୍ଲେଖନୀୟ ସଫଳତା ହାସଲ କରିଛି । ୨୦୨୪ ମସିହାରେ ୦୬ ଜଣ ମାଓବାଦୀଙ୍କ ପ୍ରାଣହାନୀ ଘଟିଥିବା ବେଳେ ୦୮ ଜଣ ଗିରଫ ହୋଇଛନ୍ତି ଏବଂ ୨୪ ଜଣ ଆତ୍ମସମର୍ପଣ କରିଛନ୍ତି। ଚଳିତବର୍ଷ ଜାନୁଆରୀ ମାସରେ ନୂଆପଡା ଜିଲ୍ଲା ସୀମାନ୍ତ ଛତିଶଗଡ଼ ଅଞ୍ଚଳରେ, ଓଡ଼ିଶା ପୁଲିସ, ଛତିଶଗଡ଼ ପୁଲିସ ଏବଂ CRPF ର ମିଳିତ ଅଭିଯାନରେ ମାଓବାଦୀ ସଂଗଠନର ଜଣେ ବରିଷ୍ଠ କ୍ୟାଡର ସହ ୧୭ ଜଣ ମାଓବାଦୀଙ୍କୁ ନିପାତ କରାଯାଇଥିଲା। ଏହି କାର୍ଯ୍ୟାନୁଷ୍ଠାନରେ ବିପୁଳ ପରିମାଣର ଅସ୍ତ୍ରଶସ୍ତ୍ର, ଗୋଳାବାରୁଦ ଏବଂ ଅନ୍ୟାନ୍ୟ ସାମଗ୍ରୀ ଜବତ କରାଯାଇଅଛି । ଏହି ଅଭିଯାନରେ ଓଡ଼ିଶା ପୋଲିସର ଏସ.ଓ.ଜି (ସ୍ପେଶାଲ ଅପରେସନ ଗୃପ) ଯବାନମାନେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । ସେହିପରି, ଚଳିତବର୍ଷ ଫେବୃଆରୀ ମାସରେ କଳାହାଣ୍ଡି ଜିଲ୍ଲା ପୋଲିସ ଆଠ ଜଣିଆ ଆନ୍ତଃରାଜ୍ୟ ଡକାୟତ ଗ୍ୟାଙ୍ଗକୁ ଗିରଫ କରିଥିଲା। ସେମାନଙ୍କ ନିକଟରୁ ପ୍ରାୟ ୩ କୋଟି ୫୧ ଲକ୍ଷ ଟଙ୍କା ଜବତ କରିବାରେ ସଫଳ ହୋଇଥିଲା। ୪୮ଘଣ୍ଟା ମଧ୍ୟରେ ସମ୍ପୃକ୍ତ ଡକାୟତଙ୍କୁ ଗିରଫ କରାଯିବା ସହ ବିପୁଳ ପରିମାଣରେ ଟଙ୍କା ଜବତ କରିବା ଘଟଣା ଓଡିଶା ପୋଲିସ ପାଇଁ ନିଶ୍ଚିତ ଭାବେ ଏକ ବିରଳ ସଫଳତା । ରାଜ୍ୟରେ ବାଲି, ମୋରମ ଏବଂ ମାଙ୍କଡା ପଥର ଚୋରା କାରବାର କରୁଥିବା ମାଫିଆଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଜିଲ୍ଲା ପ୍ରଶାସନ, ଖଣି ବିଭାଗ ଓ ପୋଲିସର ମିଳିତ ସହଯୋଗରେ ମାର୍ଚ୍ଚ ୦୭ ତାରିଖରୁ ଆରମ୍ଭ ହୋଇଥିବା ସ୍ଵତନ୍ତ୍ର ଅଭିଯାନରେ ୨୨ ମାର୍ଚ୍ଚ ପର୍ଯ୍ୟନ୍ତ ସାରା ରାଜ୍ୟରେ ବାଲି ମାଫିଆଙ୍କ ବିରୁଦ୍ଧରେ ୧୨୫୨ଟି ମାମଲା ରୁଜୁ କରାଯାଇଥିବା ବେଳେ ୧୫୦୦ଟି ବାଲି ବୋଝେଇ ଟ୍ରକ, ଟ୍ରାକ୍ଟର, ଟିପ୍ପର ଓ ହାଇୱା ଜବତ କରାଯାଇଛି। ଏହାସହ ୬୯୧ ଜଣ ବ୍ୟକ୍ତିଙ୍କୁ ଗିରଫ କରାଯାଇଥିବା ସହ ୮୧୯ ଲୋକଙ୍କୁ ନୋଟିସ ଦିଆଯାଇଛି। ଆମ ସରକାର ସଦାସର୍ବଦା ଆଇନ ଶୃଙ୍ଖଳା ରକ୍ଷା ଓ ଲୋକଙ୍କ ଧନଜୀବନ ରକ୍ଷାକୁ ପ୍ରାଥମିକତା ଦେଇଆସୁଛନ୍ତି । ସାମ୍ବିଧାନିକ କର୍ତ୍ତବ୍ୟ ପାଳନ କରି ଆଇନଶୃଙ୍ଖଳା ରକ୍ଷା କରିବା ପାଇଁ ଆମ ସରକାର ପ୍ରତିଶୃତିବଦ୍ଧ । ନିୟମିତ ଭାବରେ ରାଜ୍ୟର ଆଇନ ଶୃଙ୍ଖଳା ପରିସ୍ଥିତିକୁ ସମୀକ୍ଷା କରାଯାଉଛି ଏବଂ ରାଜ୍ୟର ସମସ୍ତ ଜନସାଧାରଣ ମାନଙ୍କ ସୁରକ୍ଷା ସୁନିଶ୍ଚିତ କରିବାକୁ ଆମେ ସଦାସର୍ବଦା ଉଦ୍ୟମ ଜାରି ରଖିଛୁ। ଭାରତର ଯଶସ୍ଵୀ ପ୍ରଧାନମନ୍ତ୍ରୀ ଶ୍ରୀଯୁକ୍ତ ନରେନ୍ଦ୍ର ମୋଦୀଜୀ ମହିଳା ମାନଙ୍କ ସୁରକ୍ଷାକୁ ସର୍ବଦା ପ୍ରାଥମିକତା ଦେଇଆସିଛନ୍ତି । ତାଙ୍କର ଦୃଢ ନେତୃତ୍ଵ ଓ ମାର୍ଗଦର୍ଶନରେ ମହିଳା , ଶିଶୁ ଓ ଦୁର୍ବଳ ଶ୍ରେଣୀର ଲୋକମାନଙ୍କ ବିରୋଧରେ ଘଟୁଥିବା ଅପରାଧର ତୁରନ୍ତ ସମାଧାନ ଏବଂ ତ୍ଵରିତ ବିଚାର ପ୍ରକ୍ରିୟା ମାଧ୍ୟମରେ ଦୋଷୀକୁ କଠୋର ଦଣ୍ଡବିଧାନ କରିବାକୁ ଆମ ସରକାର ସର୍ବୋଚ୍ଚ ପ୍ରାଧାନ୍ୟ ଦେଉଛନ୍ତି । ମହିଳା ମାନଙ୍କ ବିରୁଦ୍ଧରେ ଘଟୁଥିବା ଚାଞ୍ଚଲ୍ୟକର ଓ ସମ୍ବେଦନଶୀଳ ଅପରାଧଗୁଡିକୁ ସଫଳତାର ସହ ପରିଚାଳନା କରିବା ନିମନ୍ତେ ଉକ୍ତ ମାମଲାଗୁଡିକୁ “ରେଡ ଫ୍ଲାଗ” ପର୍ଯ୍ୟାୟଭୁକ୍ତ କରାଯାଇ ତଦନ୍ତ ପ୍ରକ୍ରିୟାକୁ ସଫଳତାର ସହ ପରିଚାଳନା ଏବଂ ବିଚାର ପ୍ରକ୍ରିୟା ଉପରେ ତୀକ୍ଷଣ ନଜର ରଖିବା ପାଇଁ ସ୍ଵତନ୍ତ୍ର ସରକାରୀ ଅଭିଯୋଜକ (ସ୍ପେଶାଲ ପବ୍ଲିକ୍ ପ୍ରସିକ୍ୟୁଟର) ଓ Holding I.O. ଙ୍କୁ ନିଯୁକ୍ତି କରାଯାଉଛି । ଫଳରେ ଚଳିତ ବର୍ଷ ରେଡ ଫ୍ଲାଗ ମାମଲାରେ ଦୋଷୀ ସାବ୍ୟସ୍ତ ହାର ବୃଦ୍ଧି ପାଇଛି । ଆମ ସରକାର ମହିଳା ଓ ଶିଶୁମାନଙ୍କ ପ୍ରତି ହେଉଥିବା ଅପରାଧିକ ମାମଲାରେ ଶୂନ୍ୟ ସହନଶୀଳତା ନୀତି ଅବଲମ୍ବନ କରି ଅଭିଯୁକ୍ତଙ୍କ ବିରୋଧରେ ଦୃଷ୍ଟାନ୍ତମୂଳକ ଓ ଦୃଢ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହିତ ପୀଡ଼ିତାକୁ ନ୍ୟାୟ ପ୍ରଦାନ କରିବାକୁ ସର୍ବଦା ଗୁରୁତ୍ଵ ଦେଉଅଛି । ଆମ ସରକାର ଶାସନକୁ ଆସିବା ପରଠାରୁ ଅର୍ଥାତ ତା ୦୧.୦୬.୨୦୨୪ ରିଖରୁ ତା ୨୮.୦୨.୨୦୨୫ ରିଖ ପର୍ଯ୍ୟନ୍ତ ମହିଳା ଓ ଶିଶୁ ମାନଙ୍କ ପ୍ରତି ହେଉଥିବା ଅପରାଧିକ ମାମଲାକୁ ଯଦି ପୂର୍ବ ବର୍ଷର ସେହି ଅବଧି ଅର୍ଥାତ ୧.୦୬.୨୦୨୩ ରୁ ୨୮.୦୨.୨୦୨୪ ରିଖ ମଧ୍ୟରେ ହୋଇଥିବା ପରିସଂଖ୍ୟାନକୁ ତୁଳନା କରାଯାଏ, ତେବେ ରାଜ୍ୟରେ ଅପରାଧ ସଂଖ୍ୟା ଅପେକ୍ଷାକୃତ ଭାବରେ ହ୍ରାସ ଘଟିଛି । ଘଟିଥିବା ହତ୍ୟା ମାମଲାର ପରିସଂଖ୍ୟାନକୁ ଅନୁଶୀଳନ କଲେ ଜଣାଯାଏ ହତ୍ୟା ମାମଲା ସଂଖ୍ୟା ପୂର୍ବବର୍ଷର ସେହି ସମୟ ଅବଧି ମଧ୍ୟରେ ଘଟିଥିବା ଅପରାଧ ୭.୪% ହ୍ରାସ ପାଇଛି। ନାବାଳିକା ଦୁଷ୍କର୍ମ ଘଟଣାରେ ଏହି ହାର ୪.୭%, ଦୁଷ୍କର୍ମ ଘଟଣାରେ ଏହି ହ୍ରାସ ହାର ୧.୭% ରହିଛି। ମହିଳା ବିରୋଧରେ ଅନ୍ୟ ଅପରାଧ ସଂଖ୍ୟା ଅନୁଧ୍ୟାନ କଲେ ଜଣାଯାଏ ଯେ, ଆମ ସରକାର ଦାୟିତ୍ଵ ଗ୍ରହଣ କଲା ପରେ ସମାନ ଅବଧିରେ ଅସଦାଚରଣ ଘଟଣାରେ ଅପରାଧ ହ୍ରାସ ହାର ୩.୯%, ଯୌନ ନିର୍ଯାତନା ଘଟଣାରେ ହ୍ରାସ ହାର ୧୩.୫%, Public disrobing of women ରେ ହ୍ରାସ ହାର ୨୨.୩%, Stalking ଘଟଣାରେ ହ୍ରାସ ହାର ୧୬.୯%, ନାରୀ ଚାଲାଣରେ ହ୍ରାସ ହାର ୨୯.୪%, Eve teasing ଘଟଣାରେ ହ୍ରାସ ହାର ୩.୮% ରହିଛି । ଠିକ ସେହିପରି ଏହି ସମୟ ମଧ୍ୟରେ ମହିଳା ବିରୋଧୀ ଅପରାଧର ତୁଳନାତ୍ମକ ସମୀକ୍ଷା କଲେ ଯୌତୁକ ଜନିତ ମୃତ୍ୟୁ କ୍ଷେତ୍ରରେ ଅପରାଧ ହ୍ରାସ ହାର ୨୦.୧% ଥିଲାବେଳେ ଯୌତୁକ ନିର୍ଯାତନା କ୍ଷେତ୍ରରେ ଏହା ୪.୬% ରହିଛି। ବିରୋଧୀ ଦଳ ବାରମ୍ବାର ଆମ ସରକାର ଅମଳର ମହିଳା ବିରୋଧରେ ଅପରାଧ ଅହେତୁକ ଭାବରେ ବୃଦ୍ଧି ପାଉଥିବାର ଅଭିଯୋଗ ଆଣୁଛନ୍ତି, ଏ ବିଷୟରେ ପବିତ୍ର ଗୃହ କାର୍ଯ୍ୟକୁ ଅବରୋଧ କରୁଛନ୍ତି। ଦିଆଯାଇଥିବା ପରିସଂଖ୍ୟାନ ସ୍ପଷ୍ଟଭାବେ ସୂଚାଇ ଦେଉଛି କିପରି ଆମ ସରକାର ମହିଳା ବିରୋଧୀ ହିଂସା ଓ ଅପରାଧ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେଇଆସୁଅଛି। ମାନବ ଚାଲାଣ ଓ ଶିଶୁ ନିଖୋଜ ସମସ୍ୟାର ମୁକାବିଲା କରିବା ପାଇଁ ଓଡ଼ିଶାର ୩୬ ଟି ପୋଲିସ ଜିଲ୍ଲାରେ ୩୬ ଟି ସମନ୍ଵିତ ମାନବ ଚାଲାଣ ପ୍ରତିରୋଧ ଶାଖା ଏବଂ ମହିଳା ଓ ଶିଶୁ ଅପରାଧ ନିରାକରଣ ଶାଖାରେ ଗୋଟିଏ ସମନ୍ଵିତ ମାନବ ଚାଲାଣ ପ୍ରତିରୋଧ ଶାଖା କାର୍ଯ୍ୟ କରୁଛି । ନିଖୋଜ ମହିଳା ଓ ଶିଶୁ ମାନଙ୍କର ଉଦ୍ଧାର ପାଇଁ ପୋଲିସ ତରଫରୁ ନିୟମିତ ବ୍ୟବଧାନରେ ସ୍ଵତନ୍ତ୍ର ଅଭିଯାନ ଚାଲିଛି। ନିକଟରେ ନିଖୋଜ ବାଳିକା ଓ ମହିଳା ମାନଙ୍କୁ ଉଦ୍ଧାର କରିବା ପାଇଁ ସମଗ୍ର ରାଜ୍ୟରେ ତା ୨୪.୦୨.୨୦୨୫ ରୁ ୨୮.୦୨.୨୦୨୫ ମଧ୍ୟରେ ସ୍ଵତନ୍ତ୍ର ଅଭିଯାନ ଚଳାଇ ୧୧୦ଜଣ ବାଳିକା ଓ ୪୩୪ଜଣ ମହିଳାଙ୍କୁ ଉଦ୍ଧାର କରାଯାଇଛି । ମହିଳା ଓ ଶିଶୁଙ୍କ ସୁରକ୍ଷା ଆମ ସରକାରର ସର୍ବୋଚ୍ଚ ପ୍ରାଥମିକତା। ଏହି ପରିପ୍ରେକ୍ଷୀରେ, ମହିଳା Help line ସ୍ଥାପନ ଓ ଦୃଢୀକରଣ, ପ୍ରାୟ ୧୦୦ଟି ସଂବେଦନଶୀଳ ଅଞ୍ଚଳରେ ସିସିଟିଭି ସ୍ଥାପନା, ଶିଶୁ ଅନୂକୁଳ ଥାନା ସ୍ଥାପନ ଆଦି ବିଭିନ୍ନ କାର୍ଯ୍ୟକୁ ସମନ୍ଵିତ କରି ସୁଭଦ୍ରା ସୁରକ୍ଷା ଯୋଜନାରେ ୨୦୨୫-୨୬ ଆର୍ଥିକ ବର୍ଷ ନିମନ୍ତେ ୧୫୨.୬ କୋଟି ଟଙ୍କା ବ୍ୟୟ ବରାଦ କରିଛନ୍ତି ଯାହା ମହିଳା ସୁରକ୍ଷା କ୍ଷେତ୍ରରେ ଏକ ଯୁଗାନ୍ତକାରୀ ପଦକ୍ଷେପ। Cyber crime ଆଜି ସମାଜ ସମ୍ମୁଖରେ ଏକ ବିରାଟ ଆହ୍ଵାନ। ବୈଷୟିକ ବିଦ୍ୟାର ପ୍ରଚାର ଓ ପ୍ରସାର ବୃଦ୍ଧି ସଙ୍ଗେ ସଙ୍ଗେ Cyber crime ରେ ମାତ୍ରାଧିକ ବୃଦ୍ଧି ପରିଲକ୍ଷିତ ହେଉଛି । ରାଜ୍ୟରେ ବୃଦ୍ଧି ପାଉଥିବା ଏହି ସାଇବର ଅପରାଧକୁ ଦୃଢତାର ସହ ମୁକାବିଲା କରିବା ଉପରେ ଆମ ସରକାର ବିଶେଷ ଗୁରୁତ୍ଵ ଦେଉଛନ୍ତି । ସଂପ୍ରତି ୧୪ଟି ଜିଲ୍ଲାରେ ସାଇବର ଥାନା ଚାଲୁଅଛି । ଅବଶିଷ୍ଟ ୨୦ ଟି ପୋଲିସ ଜିଲ୍ଲାରେ ଗୋଟିଏ ଲେଖାଏଁ ସାଇବର ଓ ଅର୍ଥନୈତିକ ଅପରାଧ ଥାନା ତୁରନ୍ତ ପ୍ରତିଷ୍ଠା କରିବା ପାଇଁ ଆମ ସରକାର ପଦକ୍ଷେପ ଗ୍ରହଣ କରୁଛନ୍ତି । ଏତଦବ୍ୟତୀତ, ଭୁବନେଶ୍ଵରସ୍ଥିତ ସାଇବର କମ୍ପ୍ଲେକ୍ସ ଠାରେ ୧୯୩୦ ସାଇବର୍‌ କ୍ରାଇମ୍ ହେଲ୍ପଲାଇନ୍ କାର୍ଯ୍ୟ କରୁଛି। ତା ୧.୦୬.୨୦୨୪ ରିଖରୁ ୨୮.୦୨.୨୦୨୫ ମଧ୍ୟରେ ସାଇବର ଠକେଇର ଶିକାର ହୋଇଥିବା ଲୋକଙ୍କୁ ପ୍ରାୟ ୩ କୋଟି ୧୯ ଲକ୍ଷ ଟଙ୍କା ଫେରସ୍ତ କରାଯାଇଥିବା ବେଳେ ସେହି ସମୟ ମଧ୍ୟରେ ଠକେଇ ହୋଇଥିବା ପ୍ରାୟ ୨୭ କୋଟି ୦୬ ଲକ୍ଷ ଟଙ୍କାର କାରବାର ଉପରେ ରୋକ ଲଗାଯାଇ ପାରିଛି । ନିଶା ବିରୋଧରେ କଠୋର ପଦକ୍ଷେପ ନେବାପାଇଁ ଆମ ସରକାର ସର୍ବଦା ସଂକଳ୍ପବଦ୍ଧ। ୨୦୨୪ ମସିହାରେ ସମୁଦାୟ ୧୨୧୭ଟି ମାମଲା ରୁଜୁ କରାଯାଇ ୧୩୮୪ କ୍ଵିଣ୍ଟାଲରୁ ଅଧିକ ଗଞ୍ଜେଇ ଜବତ କରାଯିବା ସହ ୧୬୬୯ ଜଣଙ୍କୁ ଗିରଫ କରାଯାଇଥିଲା। ଆମ ସରକାର ଦାୟିତ୍ଵ ଗ୍ରହଣ କଲାପରେ ରାଜ୍ୟ ପୋଲିସ ପକ୍ଷରୁ ଗତବର୍ଷ ନଭେମ୍ବର ୦୧ ତାରିଖରୁ ଗଞ୍ଜେଇ ଚୋରା ଚାଲାଣ ବିରୋଧରେ ଏକ ସ୍ଵତନ୍ତ୍ର ଅଭିଯାନ ଆରମ୍ଭ କରାଯାଇଥିଲା । ୨୦୨୫ ମସିହା ୧୯ ମାର୍ଚ୍ଚ ସୁଦ୍ଧା ସର୍ବମୋଟ ୨୫୩ଟି ମାମଲା ରୁଜୁ କରାଯାଇ ୮୯୮ କ୍ଵିଣ୍ଟାଲରୁ ଅଧିକ ଗଞ୍ଜେଇ ଜବତ କରାଯିବା ସହ ୩୦୮ ଜଣଙ୍କୁ ଗିରଫ କରାଯାଇଛି। ସେହିପରି ବ୍ରାଉନ ସୁଗାର ଚୋରା କାରବାର ଉପରେ ରୋକ ଲଗାଇବାକୁ ରାଜ୍ୟ ପୋଲିସ ନିୟମିତ ବ୍ଯବଧାନରେ ଚଢାଉ ଜାରି ରଖିଛି। ୨୦୨୪ ମସିହାରେ ସମୁଦାୟ ୨୦୧ ଟି ମାମଲା ରୁଜୁ କରାଯାଇ ୦୯ କେଜିରୁ ଅଧିକ ବ୍ରାଉନ ସୁଗାର ଜବତ କରାଯିବା ସହ ୩୩୯ ଜଣଙ୍କୁ ଗିରଫ କରାଯାଇଥିଲା। ୨୦୨୫ ମସିହା ୧୯ ମାର୍ଚ୍ଚ ସୁଦ୍ଧା ୩୮ ଟି ମାମଲା ରୁଜୁ କରାଯାଇ ପ୍ରାୟ ଅଢେଇ କେଜି ବ୍ରାଉନ ସୁଗାର ଜବତ କରାଯିବା ସହ ୭୭ ଜଣଙ୍କୁ ଗିରଫ କରାଯାଇଛି। ସେହିପରି ଉପାନ୍ତ ଅଞ୍ଚଳରେ ଗଞ୍ଜେଇ ଚାଷକୁ ରୋକିବା ପାଇଁ ମଧ୍ୟ ରାଜ୍ୟ ପୋଲିସ ସ୍ଵତନ୍ତ୍ର ଅଭିଯାନ ଜାରି ରଖିଛି। ଏହି ଅଭିଯାନ ଆସନ୍ତା ମାର୍ଚ୍ଚ ୩୧ ପର୍ଯ୍ୟନ୍ତ ଚାଲିବ ଏବଂ ଏହି ସମୟସୀମା ମଧ୍ୟରେ ଗଞ୍ଜେଇ ଚାଷର ସମ୍ପୁର୍ଣ୍ଣ ମୂଳୋତ୍ପାଟନ ନିମନ୍ତେ ପୋଲିସ ପ୍ରଚେଷ୍ଟା କରୁଛି। ୨୦୨୫ ମସିହା ୧୯ ମାର୍ଚ୍ଚ ପର୍ଯ୍ୟନ୍ତ ରେକର୍ଡ ପରିମାଣର ୨୭୭୨୧ ଏକର ଗଞ୍ଜେଇ ଚାଷକୁ ସଂପୂର୍ଣ୍ଣ ଭାବେ ନଷ୍ଟ କରାଯାଇଛି। ଓଡିଶା ପୋଲିସକୁ ଆହୁରି ସଶକ୍ତ କରିବା ପାଇଁ ରାଜ୍ୟ ସରକାର ନିଯୁକ୍ତି ପ୍ରକ୍ରିୟାକୁ ତ୍ୱରାନ୍ୱିତ କରିଛନ୍ତି l ଆମ ସରକାର ଶାସନକୁ ଆସିବା ପରେ ପ୍ରଥମ ପର୍ଯ୍ୟାୟରେ ବିଭିନ୍ନ ବର୍ଗରେ ଖାଲି ପଡିଥିବା ୨୯୨୨ ଗୋଟି ପଦବୀକୁ ପ୍ରତ୍ୟକ୍ଷ ନିଯୁକ୍ତି ପ୍ରକ୍ରିୟା ମାଧ୍ୟମରେ ପୂରଣ କରିବାକୁ ଅନୁମୋଦନ କରିବା ସହ ଦ୍ଵିତୀୟ ପର୍ଯ୍ୟାୟରେ ବିଭିନ୍ନ ବର୍ଗରେ ୯୫୫ ପଦବୀ ପୂରଣ କରିବାକୁ ମଧ୍ୟ ଅନୁମୋଦନ ପ୍ରଦାନ କରିଛନ୍ତି। ରାଜ୍ୟ ସରକାରଙ୍କ ନିର୍ଦ୍ଦେଶ ପରେ ଉକ୍ତ ପଦବୀଗୁଡିକର ନିଯୁକ୍ତି ପ୍ରକ୍ରିୟା ଜାରି ରହିଛି । ସାରା ରାଜ୍ୟରେ ଦେଖା ଦେଇଥିବା ଟ୍ରାଫିକ ସମସ୍ୟାକୁ ସୁଧାରିବାକୁ ଟ୍ରାଫିକ ପୋଲିସରେ ଅତିରିକ୍ତ ୨୦୦୦ ଗୋଟି ପଦବୀ ସୃଷ୍ଟି କରିବା ପ୍ରକ୍ରିୟା ଆରମ୍ଭ ହୋଇଛି । ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ସୂଚାରୁରୂପେ ମୁକାବିଲା କରିବା ପାଇଁ ଆମ ସରକାର ସଦାସର୍ବଦା ଉଦ୍ୟମ ଜାରି ରଖିଛନ୍ତି । ଏଥିପାଇଁ ପୋଲିସ ବିଭାଗକୁ ଅଧିକ ଶକ୍ତିଶାଳୀ କରିବା ନିମନ୍ତେ ଅଧିକ ଆଇ.ଆର ବାଟାଲିୟନ ଓ ଓ.ଆଇ.ଏସ.ଏଫ. ବାଟାଲିୟନ ପ୍ରତିଷ୍ଠା କରିବାକୁ ସରକାର ବିଚାର କରୁଛନ୍ତି। ଏହା ଛଡା ୩ ଟି OSSF ବାଟାଲିୟନ (ଓଡିଶା ସ୍ପେଶାଲ ଷ୍ଟ୍ରାଇକିଙ୍ଗ ଫୋର୍ସ) ସ୍ଥାପନ କରିବାକୁ ନିର୍ଦ୍ଦେଶ ଦିଆଯାଇଛି ଓ ଏହାର ୩୦୦୯ଟି ବିଭିନ୍ନ ବର୍ଗର ପଦବୀକୁ ପୂରଣ କରିବା ପ୍ରକ୍ରିୟା ଜାରି ରହିଛି । ରାଜ୍ୟ ପୋଲିସ ବିଭାଗର ଆଧୂନିକୀକରଣ ପାଇଁ Assistance to States & UTs for Modernization of Police (ASUMP) ଯୋଜନାରେ ଚଳିତ ଆର୍ଥିକ ବର୍ଷ ୨୦୨୪-୨୫ ନିମନ୍ତେ ସର୍ବ ମୋଟ ₹୨୫.୫୫ କୋଟି ଟଙ୍କା (କେନ୍ଦ୍ରୀୟ ଅନୁଦାନ ₹୧୫.୩୩ କୋଟି ଟଙ୍କା + ରାଜ୍ୟ ଅଂଶ ₹୧୦.୨୨କୋଟି ଟଙ୍କା) କେନ୍ଦ୍ର ସରକାରଙ୍କ ଦ୍ଵାରା ଅନୁମୋଦିତ ହୋଇଥିଲା । ଉକ୍ତ ଅନୁମୋଦିତ ରାଶିରୁ ₹୧୨.୭୭୫୦ କୋଟି ଟଙ୍କା (କେନ୍ଦ୍ରୀୟ ଅନୁଦାନ ₹୭.୬୬୫୦ କୋଟି ଟଙ୍କା + ରାଜ୍ୟ ଅଂଶ ₹୫.୧୧ କୋଟି ଟଙ୍କା) ରାଜ୍ୟ ସରକାରଙ୍କ ଦ୍ଵାରା ତା ୨୭.୦୨.୨୦୨୫ ରିଖରେ ପ୍ରଦାନ କରାଗଲା। ଉକ୍ତ ରାଶିରୁ ତା ୨୦.୦୩.୨୦୨୫ ରିଖ ପର୍ଯ୍ୟନ୍ତ ₹୭,୫୭,୧୭,୦୭୮ ଟଙ୍କା ବିନିଯୋଗ କରି Smart Policing ଉପକରଣ ଯଥା ଯୋଗାଯୋଗ ଉପକରଣ, ଫରେନସିକ ତାଲିମ, ଗୁଇନ୍ଦା ସୁରକ୍ଷା ଉପକରଣ, ସାଇବର ପୋଲିସିଂ, ସ୍ମାର୍ଟ ପୋଲିସିଂ ଉପକରଣ, ନିରାପତ୍ତା ଉପକରଣ, ଅତ୍ୟାଧୁନିକ ଯାନବାହନ ଆଦି କ୍ରୟ କରାଯାଉଛି । ଚଳିତ ବର୍ଷ ୧୬ଟି ଥାନାର ନବନିର୍ମିତ ଗୃହକୁ ଜନସାଧାରଣଙ୍କ ଉଦ୍ଦେଶ୍ୟରେ ଉତ୍ସର୍ଗ କରାଯାଇଛି। ଏହି ଥାନା ଗୁଡିକରେ ସମସ୍ତ ଆଧୁନିକ ବ୍ୟବସ୍ଥା ନିହିତ ରହିଛି। ରାଜ୍ୟରେ ଅପରାଧ ନିୟନ୍ତ୍ରଣ ଓ ନିରାକରଣ ପାଇଁ ଆମ ସରକାର ବିଭିନ୍ନ ଯୋଜନା ହାତକୁ ନେଇଛନ୍ତି । ଥାନା ଗୁଡିକୁ ଅଧିକ କ୍ରିୟାଶୀଳ ଏବଂ ପୋଲିସକୁ ଆହୁରି ଲୋକାଭିମୁଖୀ କରିବାକୁ ଆଗାମୀ ଦିନରେ ସମସ୍ତ ଥାନାମାନଙ୍କରେ ଅତିରିକ୍ତ ଯାନ ହିସାବରେ ଦ୍ରୁତ ଗାମୀ ସ୍କର୍ପିଓ ଗାଡି ଯୋଗାଇ ଦିଆଯାଉଛି । ଏତଦ ବ୍ୟତୀତ ପ୍ରତ୍ୟେକ ଥାନାକୁ ୬ ଗୋଟି ନୂଆ ମୋଟର ସାଇକେଲ ମଧ୍ୟ ଦିଆ ଯିବାକୁ ପଦକ୍ଷେପ ନିଆ ଯାଇଛି । ୨୦୨୪-୨୫ ଆର୍ଥିକ ବର୍ଷରେ ରାଜ୍ୟ ବଜେଟ ଅନୁଦାନରେ ବିଭିନ୍ନ କିସମର ଯାନବାହାନ କ୍ରୟ ନିମନ୍ତେ ରାଜ୍ୟ ସରକାର ମୋଟ ୬୩.୮୨ କୋଟି ଟଙ୍କା ପ୍ରଦାନ କରିଛନ୍ତି । ସେହିଭଳି, କେନ୍ଦ୍ର ସରକାର ୨୦୨୪-୨୫ ଆର୍ଥିକ ବର୍ଷରେ ASUMP ଯୋଜନାରେ ବିଭିନ୍ନ କିସମର ଯାନବାହାନ କ୍ରୟ କରିବା ପାଇଁ ୩.୭୮ କୋଟି ଟଙ୍କା ( କେନ୍ଦ୍ରୀୟ ଅନୁଦାନ ୨.୨୭ କୋଟି ଟଙ୍କା + ରାଜ୍ୟ ଅନୁଦାନ ୧.୫୧ କୋଟି ଟଙ୍କା ) ଅନୁମୋଦନ ପ୍ରଦାନ କରିଛନ୍ତି । ଆବଶ୍ୟକତାକୁ ଦୃଷ୍ଟିରେ ରଖି , ଉପରୋକ୍ତ ପାଣ୍ଠିକୁ ବିନିଯୋଗ କରି ୪୪ ଟି ବସ୍ , ୧୨ ଟି ଟ୍ରକ୍ , ୩ ଟି ବୁଲେଟ ପୃଫ ଯାନ, ୬ ଟି ମଧ୍ୟମ ଯାନ, ୧ ଟି ଆମ୍ବୁଲାନ୍ସ , ୧୦ ଟି ପ୍ରିଜନ୍ ଭ୍ୟାନ,୦୯ ଟି ଦ୍ରୁତଗାମୀ ହାଲୁକା ଯାନ , ୮୨ ଟି ହାଲୁକା ମୋଟର ଯାନ , ୨୭୦୦ ଟି ମୋଟର ସାଇକେଲ୍, ୨୦୦ ଟି ବୁଲେଟ ମଟର ସାଇକଲ, ୭୫୫ ଗୋଟି ସ୍କୁଟି ଏବଂ ୦୨ ଟି ରକ୍ଷକ ଯାନ କ୍ରୟ କରାଯିବା ପାଇଁ ନିଷ୍ପତ୍ତି ନିଆଯାଇଛି । ଏତଦବ୍ୟତୀତ, ୨୫୫ଟି ହାଲୁକା ମଟରଯାନ କ୍ରୟ କରିବା ପାଇଁ ଅନୁମତି ପ୍ରଦାନ କରାଯାଇଛି । ରାଜ୍ୟରେ ଆଇନ ଶୃଙ୍ଖଳା ବଜାୟ ରଖିବା ଏବଂ ଅପରାଧ ନିୟନ୍ତ୍ରଣ କରିବା ହେଉଛି ଆମ ସରକାରଙ୍କର ସର୍ବୋଚ୍ଚ ପ୍ରାଥମିକତା । ସାମୂହିକ ପ୍ରୟାସ , ଜ୍ଞାନ କୌଶଳ ଏବଂ ଦୁରଦୃଷ୍ଟି ଦ୍ଵାରା ରାଜ୍ୟରେ ଶାନ୍ତି ଓ ସୌହାର୍ଦ୍ଦ୍ୟ ବଜାୟ ରଖିବାକୁ ଆମ ସରକାର ପ୍ରତିଶୃତିବଦ୍ଧ । ଅପରାଧ ଓ ଜରୁରୀ ସମୟରେ ତୁରନ୍ତ ସେବା ଯୋଗାଇ ଦେବାପାଇଁ ରାଜ୍ୟ ସରକାର ( Emergency Response Support System) ERSS ୨୦୨୧ ମସିହାରେ କେନ୍ଦ୍ର ସରକାରଙ୍କ ସହାୟତାରେ କାର୍ଯ୍ୟକାରୀ କରିଛନ୍ତି । ଯେଉଁଥିରେ , ଡାଏଲ୍ ୧୧୨ ହେଲ୍ପଲାଇନ ଓଡିଶାର ସମସ୍ତ ଜିଲ୍ଲାରେ କାର୍ଯ୍ୟ କରିବା ସହିତ ଅନ୍ୟାନ୍ୟ ଜରୁରୀକାଳୀନ ସେବା ଯେପରିକି ପୋଲିସ (୧୦୦)ଅଗ୍ନିଶମ (୧୦୧)ରେଳ ମଦଦ (୧୩୯)ବିପର୍ଯ୍ୟୟ ପରିଚାଳନା (୧୦୭୦) ଆମ୍ବୁଲାନ୍ସ ସେବା (୧୦୮) ଏବଂ ଶିଶୁ ହେଲ୍ପଲାଇନ ସେବା (୧୦୯୮) ସହିତ ସମନ୍ଵିତ ହୋଇଛି । ଜରୁରୀକାଳିନ ପ୍ରତିକ୍ରିୟା ସହାୟତା ବ୍ୟବସ୍ଥା କୁ ଅଧିକ ସୁଦୃଢ କରିବା ପାଇଁ ଆବଶ୍ୟକ ବ୍ୟବସ୍ଥା କରାଯାଇଛି। ERSS ର କାର୍ଯ୍ୟକାରିତା ବୃଦ୍ଧି ନିମନ୍ତେ ଏହାର ଦ୍ଵିତୀୟ ପର୍ଯ୍ୟାୟ ସଂପ୍ରସାରଣ ୨୦୨୫-୨୬ ରୁ ୨୦୨୮-୨୯ ମଧ୍ୟରେ କରିବାକୁ ସରକାର ବିଚାର କରୁଛନ୍ତି । ପ୍ରତିଶୃତି ମୁତାବକ ୧୨୪୩ ଗୋଟି ନୂଆ ପଦବୀ ସୃଷ୍ଟିର ପ୍ରକ୍ରିୟା ଆରମ୍ଭ ହୋଇଛି । ଓଡ଼ିଶା ଅଗ୍ନିଶମ ଓ ଜରୁରୀକାଳୀନ ସେବା ଓଡ଼ିଶା ବାସୀଙ୍କ ଧନ, ଜୀବନକୁ ଅଗ୍ନି କବଳରୁ ରକ୍ଷା କରିବା ସଙ୍ଗେସଙ୍ଗେ ଅନ୍ୟାନ୍ୟ ପ୍ରାକୃତିକ ବିପର୍ଯ୍ୟୟ ସମୟରେ ଜନସାଧାରଣଙ୍କୁ ସହାୟତା ପ୍ରଦାନ କରିଆସୁଅଛି । ଭୟାବହ ଦୁର୍ଘଟଣାରୁ ଜନସାଧାରଣଙ୍କୁ ରକ୍ଷା କରିବା ସହ ଅଗ୍ନିଶମ ସେବା ସଂସ୍ଥା ସମସ୍ତ ପ୍ରକାରର ଦୁର୍ବିପାକ ଓ ମନୁଷ୍ୟକୃତ ବିପର୍ଯ୍ୟୟ, ବିତ୍ପାତ, ଦୁର୍ଘଟଣା ଇତ୍ୟାଦି ସମୟରେ ପ୍ରଥମ ସାହାଯ୍ୟକାରୀ ଭାବରେ ପହଞ୍ଚି ଦକ୍ଷତାର ସହିତ କାର୍ଯ୍ୟ ସମ୍ପାଦନ କରିଥାନ୍ତି । ଓଡ଼ିଶା ଅଗ୍ନିଶମ ଓ ଜରୁରୀକାଳୀନ ସେବା ବିପର୍ଯ୍ୟୟ ପରିଚାଳନା କ୍ଷେତ୍ରରେ ଏକ ଦକ୍ଷ ସଂସ୍ଥା ଭାବରେ ସମଗ୍ର ଦେଶରେ ସୁପରିଚିତ । ଏହି ସଂସ୍ଥାର ଉନ୍ନତି ନିମନ୍ତେ ରାଜ୍ୟ ସରକାରଙ୍କର ନିଜସ୍ଵ ବଜେଟ୍, ରାଜ୍ୟ ବିପର୍ଯ୍ୟୟ ପ୍ରଶମନ ପାଣ୍ଠି (SDRF) ଓ କେନ୍ଦ୍ର ସରକାର ପଞ୍ଚଦଶ ଅର୍ଥ କମିଶନରେ ଅନୁଦାନ ମଞ୍ଜୁର କରାଯାଇଛି । ଓଡ଼ିଶା ଅଗ୍ନି ନିରାପତ୍ତା ନିୟମ, ୨୦୧୭ ଅନୁସାରେ ବଡ ପ୍ରତିଷ୍ଠାନ, ଡାକ୍ତରଖାନା, ହୋଟେଲ, ମଲ୍, କଳ କାରଖାନା ଇତ୍ୟାଦି ନିମନ୍ତେ ଅଗ୍ନି ସୁରକ୍ଷା ପ୍ରମାଣପତ୍ର ଆବଶ୍ୟକ । ଏହି ପ୍ରକ୍ରିୟାର ସରଳୀକରଣ ନିମନ୍ତେ ଓଡ଼ିଶା ଅଗ୍ନି ନିରାପତ୍ତା ନିୟମକୁ ତା.୧୭.୦୩.୨୦୨୫ରିଖରେ ସଂଶୋଧନ କରାଯାଇଅଛି । ବର୍ତ୍ତମାନ ରାଜ୍ୟରେ ମଞ୍ଜୁରିପ୍ରାପ୍ତ ୩୪୬ ଗୋଟି ଦମକଳ କେନ୍ଦ୍ର ମଧ୍ୟରୁ ୩୪୫ ଗୋଟି ଦମକଲ କେନ୍ଦ୍ର କାର୍ଯ୍ୟକ୍ଷମ ହୋଇଛି । ଅଧିକ ଦମକଳ କେନ୍ଦ୍ର ଖୋଲିବା ନିମନ୍ତେ ସବୁ ଦିଗକୁ ଦୃଷ୍ଟିରେ ରଖି ସରକାର ବିଚାର କରୁଛନ୍ତି । ଓଡ଼ିଶା ଅଗ୍ନିଶମ ଓ ଜରୁରୀକାଳୀନ ସେବାରେ ୯୪୧ ଜଣ ଅଗ୍ନିଯୋଦ୍ଧା ଓ ଅଗ୍ନୀଯୋଦ୍ଧା ଗାଡିଚାଳକଙ୍କୁ ନିଯୁକ୍ତି ଦିଆଯାଇଅଛି ଓ ସେମାନଙ୍କୁ ଆବଶ୍ୟକ ପ୍ରଶିକ୍ଷଣ ଦିଆଯାଉଅଛି । ସରକାର ଗୃହରକ୍ଷୀ ମାନଙ୍କ ନିଯୁକ୍ତି ବନ୍ଦ କଟକଣାକୁ ଉଠାଇଦେଇଛନ୍ତି । ବର୍ତ୍ତମାନ ରାଜ୍ୟରେ ଗୃହରକ୍ଷୀ ମାନଙ୍କ ମଞ୍ଜୁରିପ୍ରାପ୍ତ ସଂଖ୍ୟା ୧୭୬୭୫, ଅଧୁନା ୧୫,୦୫୯ ଜଣ ଗୃହରକ୍ଷୀ କାର୍ଯରତ ଅଛନ୍ତି ଏବଂ ଖାଲିଥିବା ପଦବୀ ସଂଖ୍ୟା ୨୬୧୬ ପୂରଣ କରିବା ପାଇଁ ଜିଲ୍ଲା ସ୍ତରରେ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଛି । ଆମ ସରକାର ଆଇନ ଶୃଙ୍ଖଳା ରକ୍ଷା ଓ ଲୋକଙ୍କ ଧନଜୀବନ ସୁରକ୍ଷାକୁ ପ୍ରାଥମିକତା ଦେବା ସହିତ ଜେଲ ବିଭାଗର ସୁଦୃଢୀକରଣ ତଥା ବନ୍ଦୀ ମାନଙ୍କର ସୁବିଧା ସୁଯୋଗ ଓ ସେମାନଙ୍କର ସଂସ୍କାର ପାଇଁ ନିରନ୍ତର ବିଭିନ୍ନ ପଦକ୍ଷେପ ଗ୍ରହଣ କରିଆସୁଛନ୍ତି । ଏଠାରେ ଗୃହକୁ ଜଣାଇ ଦେବାକୁ ଚାହେଁ ଯେ ରାଜ୍ୟର ପ୍ରମୁଖ ସହରଗୁଡିକ ମଧ୍ୟରେ ଥିବା କାରାଗାରଗୁଡିକର ସୁରକ୍ଷାକୁ ଦୃଷ୍ଟିରେ ରଖି ସହରର ଉପକଣ୍ଠକୁ ସ୍ଥାନାନ୍ତରିତ କରିବା ପାଇଁ ପଦକ୍ଷେପ ନିଆଯାଇଛି । କାରାଗାରଗୁଡିକର ବନ୍ଦୀ ମାନଙ୍କୁ ଆଧୁନିକ ସୁବିଧା ଯୋଗାଇ ଦେବା ସହିତ କାରାଗାରର ସୁରକ୍ଷାକୁ ଦୃଷ୍ଟିରେ ରଖି ଆଧୁନିକ ସୁବିଧା ସହିତ ସଜ୍ଜିତ ଖୋର୍ଦ୍ଧା ଜିଲ୍ଲାର ଜାମୁଝରୀରେ ୨୫୦୦ କ୍ଷମତା ବିଶିଷ୍ଟ ନୂତନ ମଡେଲ ଜେଲ ଆଧୁନିକ ସଂଶୋଧନ ମାନଦଣ୍ଡ ଅନୁସାରେ ଅତ୍ୟାଧୁନିକ ସୁବିଧା ସହିତ ଏକ ନୂତନ ଜେଲ ନିର୍ମାଣ କରାଯାଉଅଛି ଏବଂ ଯାଜପୁର ଜିଲ୍ଲାର ଏରବାଙ୍କାରେ ୫୦୦ କ୍ଷମତା ବିଶିଷ୍ଟ ଏକ ନୂତନ ଜିଲ୍ଲା କାରାଗାର ନିର୍ମାଣ କରାଯାଉଛି । ଏତଦବ୍ୟତୀତ ଭଦ୍ରକ ଜିଲ୍ଲାର ବାହୁଦରଡା ଠାରେ ୫୦୦ କ୍ଷମତା ବିଶିଷ୍ଟ ନୂତନ ଜିଲ୍ଲା ଜେଲ୍ ନିର୍ମାଣ ନିମନ୍ତେ ବିହିତ ପଦକ୍ଷେପ ଗ୍ରହଣ କରାଯାଉଅଛି । ରାଜ୍ୟରେ ୬୪୫ ଗୋଟି ଥାନାରେ ସି.ସି.ଟି.ଭି. ଲଗାଯାଇଥିବା ବେଳେ ୨୯୫ ଟି ଫାଣ୍ଡିରେ ସିସିଟିଭି ଲଗାଯିବାର କାର୍ଯ୍ୟ ଜାରି ରହିଛି । ଖୁବଶୀଘ୍ର ଏହି ପ୍ରକ୍ରିୟା ସମାପ୍ତ ହେବ। ରାଜ୍ୟ ସରକାର ଉପକୂଳ ସୁରକ୍ଷାକୁ ଅଧିକ ସୁଦୃଢ ଓ କଡାକଡି କରିବା ଉପରେ ଗୁରୁତ୍ଵ ଦେଉଛନ୍ତି । ଓଡ଼ିଶା ଉପକୂଳ ସୁରକ୍ଷାର ଆଧୁନିକୀକରଣ ନିମନ୍ତେ ଆମ ସରକାର ୨୦୨୪-୨୫ ଅତିରିକ୍ତ ବଜେଟରେ ୨୨ କୋଟି ଟଙ୍କା ମଞ୍ଜୁର କରିଛନ୍ତି । ଉକ୍ତ ଅର୍ଥରାଶିକୁ ବିନିଯୋଗ କରି ସାମୁଦ୍ରିକ ପାଟ୍ରୋଲିଂ ପାଇଁ ଟ୍ରଲର ଭଡାରେ ଆଣିବା , ଭୁବନେଶ୍ଵର ଠାରେ ଉପକୂଳ ସୁରକ୍ଷା ନିର୍ଦ୍ଦେଶ ଓ ନିୟନ୍ତ୍ରଣ କେନ୍ଦ୍ର ସ୍ଥାପନ କରିବା, ପ୍ରତ୍ୟେକ ସାମୁଦ୍ରିକ ଥାନା ପାଇଁ ଡ୍ରୋନ କ୍ରୟ କରିବା , ନୌସେନା ବିଶେଷଜ୍ଞ ଓ ବୈଷୟିକ ପରାମର୍ଶଦାତାଙ୍କୁ ନିୟୋଜିତ କରିବା , ମାଛ ଧରା ଅବତରଣ କେନ୍ଦ୍ରରେ ସ୍ୱତନ୍ତ୍ର ସାମୁଦ୍ରିକ ପୋଲିସ ଅଧିକାରୀଙ୍କୁ ନିୟୋଜିତ କରିବା ଏବଂ ସମସ୍ତ ସାମୁଦ୍ରିକ ଥାନା ଗୁଡିକରେ କମ୍ୟୁନିଟି ପୋଲିସିଂ କାର୍ଯ୍ୟକଳାପ ପରିଚାଳନା କରିବା ଇତ୍ୟାଦି କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ପଦକ୍ଷେପ ଗ୍ରହଣ କରାଯାଉଛି । ରାଜ୍ୟରେ ପ୍ରାକୃତିକ ବିପର୍ଯ୍ୟୟର ମୁକାବିଲା କରିବା ପାଇଁ ୨୦୦୧ ମସିହାରେ “ ଓଡିଶା ବିପର୍ଯ୍ୟୟ ରାପିଡ୍ ଆକ୍ସନ ଫୋର୍ସ” (ODRAF) ନାମରେ ଏକ ଟାସ୍କ ଫୋର୍ସ ଗଠନ କରାଯାଇଥିଲା । ପୂର୍ବ ସରକାର ODRAF ର ୨୦ ଗୋଟି ୟୁନିଟ୍ ସୃଷ୍ଟି କରି ବିଭିନ୍ନ ସ୍ଥାନରେ ମୁତୟନ କରିଥିଲେ। ଆମ ସରକାର କ୍ଷମତାକୁ ଆସିବାର ଅଳ୍ପ ଦିନ ମଧ୍ୟରେ ପ୍ରାକୃତିକ ବିପର୍ଯ୍ୟୟ ପରିଚାଳନା କ୍ଷେତ୍ରରେ ଏହି ଭିତ୍ତିଭୂମିକୁ ଆହୁରି ସୁଦୃଢ କରିବା ପାଇଁ ଆଉ ୧୦ ଟି ୟୁନିଟ୍ ବୃଦ୍ଧି କରିବା ପାଇଁ ନୀତିଗତ ନିଷ୍ପତ୍ତି ନେଇଛନ୍ତି। ବର୍ତ୍ତମାନ ପ୍ରଚଳିତ ନୂତନ ଅପରାଧିକ ଆଇନ୍, ଭାରତୀୟ ନ୍ୟାୟ ସଂହିତା, ଭାରତୀୟ ନାଗରିକ ସୁରକ୍ଷା ସଂହିତା ଓ ଭାରତୀୟ ସାକ୍ଷ୍ୟ ଅଧିନିୟମକୁ ଆହୁରି ଅଧିକ କ୍ରିୟାଶୀଳ କରିବା ପାଇଁ ପୋଲିସ ବିଭାଗକୁ ନିର୍ଦ୍ଦେଶ ଦିଆଯାଇଛି। ଏହି ନୂତନ ଆଇନ ବର୍ତ୍ତମାନ ସମୟରେ ଲୋକଙ୍କୁ ତ୍ଵରିତ ନ୍ୟାୟ ଦେବାରେ ନିଶ୍ଚିତ ଭାବେ ସହାୟକ ହେବ। ନୂତନ ଅପରାଧିକ ଆଇନ ଲାଗୁ ହେବା ପରେ ଏହାର ବିଭିନ୍ନ ଦିଗ, କାର୍ଯ୍ୟକାରିତା, ଦୈନନ୍ଦିନ ଜୀବନରେ ଏହାର ପ୍ରଭାବ ସଂକ୍ରାନ୍ତରେ ଓଡିଶା ପୋଲିସ ପକ୍ଷରୁ ସଚେତନତା କାର୍ଯ୍ୟକ୍ରମ କରାଯାଉଛି | ଏହି ସଚେତନତା କାର୍ଯ୍ୟକ୍ରମରେ ସ୍ଥାନୀୟ ବାସିନ୍ଦା, ବୁଦ୍ଧିଜୀବୀ, ବରିଷ୍ଠ ନାଗରିକ, କଲେଜ ଛାତ୍ରଛାତ୍ରୀ, ବ୍ୟବସାୟୀ ଏବଂ ବଜାର ସଂଘର ସଦସ୍ୟମାନେ ସକ୍ରିୟ ଭାବରେ ଅଂଶଗ୍ରହଣ କରୁଛନ୍ତି, ଯାହାକି ଏକ ସ୍ଵାଗତ ଯୋଗ୍ୟ ପଦକ୍ଷେପ। ଅପରାଧ ନିରାକରଣ, ସାଇବର ଅପରାଧ ନିୟନ୍ତ୍ରଣ, ଅପରାଧ ଅନୁସନ୍ଧାନ କ୍ଷେତ୍ରରେ ବୈଷୟିକ ବିଦ୍ୟାର ପ୍ରୟୋଗୀକରଣ, ଟ୍ରାଫିକ ନିୟନ୍ତ୍ରଣ ବ୍ୟବସ୍ଥାର ଆଧୂନିକୀକରଣ, ଅପରାଧ ଅନୁଶୀଳନ କ୍ଷେତ୍ରରେ କୃତ୍ରିମ ବୁଦ୍ଧିମତ୍ତାର ପ୍ରୟୋଗ, Anti drone technology centre of cyber excellency ସ୍ଥାପନ ଆଦି ବ୍ୟବସ୍ଥାର ଉପଯୋଗ କରି ପୋଲିସକୁ ଆଧୁନିକ ଏବଂ ବୈଷୟିକ କୌଶଳଯୁକ୍ତ କରିବା ପାଇଁ ଆମ ସରକାର ସମସ୍ତ ପଦକ୍ଷେପ ଗ୍ରହଣ କରୁଛନ୍ତି ଏବଂ ଏହି ବଜେଟରେ ଏଥିପାଇଁ ବ୍ୟୟ ବରାଦ କରିଛି। ବିକଶିତ ଭାରତ ଓ ବିକଶିତ ଓଡିଶାର ସଂକଳ୍ପକୁ ସାକାର କରିବାରେ ଗୃହ ବିଭାଗର ଭୂମିକା ଗୁରୁତ୍ଵପୂର୍ଣ୍ଣ। ଏକ ସୁଦୃଢ ଆଇନ ଶୃଙ୍ଖଳା ବ୍ୟବସ୍ଥା ରାଜ୍ୟର ଦ୍ରୁତ ଶିଳ୍ପାୟନ ଓ ସର୍ବବିଧ ବିକାଶ ପାଇଁ ନିତାନ୍ତ ଆବଶ୍ୟକ। ମହିଳା, ଶିଶୁ, ଦୁର୍ବଳ ଓ ଅନ୍ୟାନ୍ୟ ପଛୁଆ ବର୍ଗଙ୍କ ସୁରକ୍ଷା ସରକାରଙ୍କ ପ୍ରାଥମିକତା । ଏହାର ସଫଳ ରୂପାନ୍ତରିକରଣ ନିମନ୍ତେ ଗୃହ ବିଭାଗର ଉପସ୍ଥାପିତ ବ୍ୟୟ ବରାଦ ପ୍ରସ୍ତାବଟିକୁ ସ୍ଵୀକୃତି ପ୍ରଦାନ କରିବା ନିମନ୍ତେ ମୁଁ ମାନ୍ୟବର ସଦସ୍ୟମାନଙ୍କୁ ଅନୁରୋଧ କରୁଛି ।

ରାଉଲକେଲା: ସୁନ୍ଦରଗଡ଼ ଜିଲ୍ଲାରେ ପୁରୀ - ରାଉଲକେଲା ବନ୍ଦେ ଭାରତ ଟ୍ରେନ୍ ଉପରକୁ ପଥର ମାଡ଼ ହୋଇଛି। କଳୁଙ୍ଗା ରେଳ ଷ୍ଟେସନ୍ ଦେଇ ଯାଉଥିବା ବେଳେ ପଥର ମାଡ଼ ହୋଇଥିବା ସୂଚନା। ଟ୍ରେନ୍ ର ୨ଟି କୋଚ୍ ର ଝରକା କାଚ ଭାଙ୍ଗି ଯାଇଥିବା ଜଣାପଡ଼ିଛି। ଏଥିରେ କୌଣସି ଯାତ୍ରୀ ଆହତ ହୋଇନାହାନ୍ତି।

କଟକ: ଓଡ଼ିଶା ହାଇକୋର୍ଟର ମୁଖ୍ୟ ବିଚାରପତି ଭାବେ ଶପଥ ନେଲେ ଜଷ୍ଟିସ୍ ହରିଶ ଟଣ୍ଡନ । ପଦ ଓ ଗୋପନୀୟତାର ଶପଥ ପାଠ କରାଇଲେ ରାଜ୍ୟପାଳ ହରିବାବୁ କୁମ୍ଭମପତି। ଶପଥ ଉତ୍ସବରେ ସାମିଲ୍ ହେଲେ ମୁଖ୍ୟମନ୍ତ୍ରୀ ମୋହନ ମାଝୀ।

ବିଜାପୁର: ଛତିଶଗଡ଼ ବିଜାପୁର ଗାଙ୍ଗଲୁର ଜଙ୍ଗଲରେ ମାଓବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳବିନିମୟ ହୋଇଛି। ସୁରକ୍ଷାକର୍ମୀଙ୍କ ଗୁଳିରେ ଦୁଇ ଜଣ ମାଓବାଦୀଙ୍କ ମୃତ୍ୟୁ ହୋଇଥିବା ବେଳେ ଜଣେ ଦିଷ୍ଟ୍ରିକ୍ଟ ରିଜର୍ଭ ଗାର୍ଡ ର ଜଣେ ଯବାନ ସହିଦ ହୋଇଥିବା ଜଣାପଡ଼ିଛି। ଘଟଣାସ୍ଥଳରୁ ବହୁ ପରିମାଣର ଅସ୍ତ୍ରଶସ୍ତ୍ର ଜବତ କରାଯାଇଛି।

ଭୁବନେଶ୍ୱର: ମହାକାଶରୁ ପୃଥିବୀକୁ ଫେରିଲେ ସୁନୀତା ୱିଲିୟମସ୍। ୯ ମାସ ପରେ ଅନ୍ତର୍ଜାତୀୟ ମହାକାଶ କେନ୍ଦ୍ରରୁ ଫେରିଲେ ସୁନୀତା। ଭାରତୀୟ ସମୟ ୩ଟା ୨୭ ରେ ଆମେରିକାର ଫ୍ଲୋରିଡା ଉପକୂଳରେ ଅବତରଣ କଲେ ସୁନୀତା। ସୁନୀତାଙ୍କ ସମେତ ୪ ମହାକାଶଚାରୀ ମଧ୍ୟ ଫେରିଥିବା ସୂଚନା। ଦୀର୍ଘ ୧୭ ଘଣ୍ଟାର ଯାତ୍ରା ପରେ ଫ୍ଲୋରିଡା ତଟରେ ଅବତରଣ କରିଛନ୍ତି ସୁନୀତା।

ନୂଆଦିଲ୍ଲୀ: ଆଜି ୭୬ ତମ ଗଣତନ୍ତ୍ର ଦିବସ ଅବସରରେ ଦିଲ୍ଲୀ କର୍ତ୍ତବ୍ୟ ପଥରେ ଜାତୀୟ ପତାକା ଉତ୍ତୋଳନ କଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ମୁଖ୍ୟ ଅତିଥି ଭାବରେ ଉପସ୍ଥିତ ଥିଲେ ଇଣ୍ଡୋନେସିଆ ରାଷ୍ଟ୍ରପତି । କର୍ତ୍ତବ୍ୟ ପଥରେ ଗଡ଼ିଲା ବିନାଶକାରୀ ଲଞ୍ଚର୍ 'ପିନାକ'। ଏହା ବ୍ୟତୀତ, ବ୍ରହ୍ମୋସ୍ ମିଜାଇଲ୍ ର ସୌର୍ଯ୍ୟ ପ୍ରଦର୍ଶନ ହୋଇଛି।

ନୂଆଦିଲ୍ଲୀ: ସ୍ଵାମୀତ୍ଵ ଯୋଜନାରେ ସମ୍ପତ୍ତି କାର୍ଡର ଇ-ବିତରଣର ଶୁଭାରମ୍ଭ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଆଭାସୀରେ ହିତାଧିକାରୀଙ୍କ ସହ କଥା ହେଲେ ପ୍ରଧାନମନ୍ତ୍ରୀ । ଓଡ଼ିଶାର ରାୟଗଡ଼ାରେ ଉପସ୍ଥିତ ଥିଲେ ମୁଖ୍ୟମନ୍ତ୍ରୀ ମୋହନ ମାଝୀ। ପ୍ରଧାନମନ୍ତ୍ରୀ କହିଛନ୍ତି ଯେ ୬୫ ଲକ୍ଷରୁ ଊର୍ଦ୍ଧ୍ବ ପରିବାରକୁ ଏହି କାର୍ଡ ମିଳିଛି। ସ୍ଵାମୀତ୍ଵ ପ୍ରମାଣପତ୍ର କାର୍ଡ ଏକ ଉତ୍ତମ ସରକାରୀ ପଦକ୍ଷେପ। ସମ୍ପତ୍ତିର ଅଧିକୃତ କାଗଜପତ୍ର ପାଇବାରେ ଏଣିକି ଅସୁବିଧା ହେବନାହିଁ।

ଭୁବନେଶ୍ୱର: ଭାରତର ସର୍ବବୃହତ ଟେଲିକମ ଓ ଡିଜିଟାଲ ସେବା ପ୍ରଦାନକାରୀ କମ୍ପାନୀ ଜିଓ ପ୍ଲାଟଫର୍ମସ ଲିମିଟେଡ଼ ଚଳିତ ଆର୍ଥିକ ବର୍ଷର ତୃତୀୟ ତ୍ରୟମାସରେ ୬,୮୬୧ କୋଟି ଟଙ୍କା ନେଟ ଲାଭ ହାସଲ କରିଥିବା କମ୍ପାନୀ ପକ୍ଷରୁ ପ୍ରକାଶ କରାଯାଇଛି। ୨୦୨୪-୨୫ ଆର୍ଥିକ ବର୍ଷର ଅକ୍ଟୋବର ରୁ ଡିସେମ୍ବର ତ୍ରୟମାସରେ ଜିଓ ପ୍ଲାଟଫର୍ମସର ନେଟ ଲାଭ ପୂର୍ବ ବର୍ଷ ସମାନ ସମୟ ତୁଳନାରେ ୨୬ ପ୍ରତିଶତ ବୃଦ୍ଧି ପାଇଛି। ୨୦୨୪ ବର୍ଷ ଶେଷ ସୁଦ୍ଧା, ଦେଶରେ ମୋଟ ଜିଓ ଗ୍ରାହକଙ୍କ ସଂଖ୍ୟା ୪୮ କୋଟି ୨୧ ଲକ୍ଷରେ ପହଞ୍ଚିଛି, ଯାହାକି ଗତ ବର୍ଷ ତୁଳନାରେ ୨.୪% ଅଧିକ। ଏହି ତ୍ରୟମାସରେ ଜିଓ ୩୩ ଲକ୍ଷ ଗ୍ରାହକ ଯୋଡିଛି। ହୋମ ବ୍ରଡ଼ବ୍ୟାଣ୍ଡ ସଂଯୋଗ ଦୃଷ୍ଟିକୋଣରୁ ଜିଓ ପାଇଁ ଏହା ମଧ୍ୟ ଏକ ରେକର୍ଡ ତ୍ରୟମାସ ଥିଲା, ଯେଉଁଥିରେ ୨୦ ଲକ୍ଷ ନୂତନ ସଂଯୋଗ ଯୋଗ କରାଯାଇଥିଲା। ଏଥିସହିତ ଜିଓ ଏୟାରଫାଇବର ମଧ୍ୟ ଦ୍ରୁତ ଅଭିବୃଦ୍ଧି ହାସଲ କରିଛି ଏବଂ ଏହାର ଗ୍ରାହକ ଆଧାର ୪୫ ଲକ୍ଷରେ ପହଞ୍ଚିଥିବା କମ୍ପାନୀ ପକ୍ଷରୁ ପ୍ରକାଶ କରାଯାଇଛି। ଜିଓର ୫ଜି ଗ୍ରାହକ ଆଧାର ୧୭ କୋଟି ଅତିକ୍ରମ କରିବା ସହିତ ଏହା ଚୀନ ବାହାରେ ବିଶ୍ୱର ସର୍ବବୃହତ ଏକକ ୫ଜି ଅପରେଟର ହୋଇପାରିଛି। ଟ୍ରୁ୫ଜି ଜିଓର ମୋଟ ୱେରଲେସ ଟ୍ରାଫିକର ୪୦% ରହିଛି। ଏହି ତ୍ରୟମାସରେ ଜିଓର ଗ୍ରାହକ ପିଛା ପ୍ରତିମାସ ରାଜସ୍ବ ୨୦୩.୩ ଟଙ୍କାକୁ ବୃଦ୍ଧି ପାଇଥିବା ବେଳେ ପ୍ରତି ମାସରେ ମୁଣ୍ଡପିଛା ଡାଟା ବ୍ୟବହାର ୩୨.୩ ଜିବିରେ ପହଞ୍ଚିଛି ଯାହା ଶିଳ୍ପରେ ସର୍ବାଧିକ। ଏହା ବ୍ୟତୀତ ମୋଟ ଡାଟା ଟ୍ରାଫିକରେ ୨୨.୨% ବୃଦ୍ଧି ରେକର୍ଡ କରାଯାଇଛି। ସେହିଭଳି ଆଜି ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ଼ର ତୃତୀୟ ତ୍ରୟ ମାସ ଆର୍ଥିକ ଫଳାଫଳ ଘୋଷଣା କରାଯାଇଛି। ରିଟେଲ ଓ ଟେଲିକମ ବ୍ୟବସାୟ କ୍ଷେତ୍ରରେ ଉଲ୍ଲେଖନୀୟ ପ୍ରଦର୍ଶନ ସହିତ ଏହି ତ୍ରୟମାସରେ ରିଲାଏନ୍ସର ଏକୀଭୂତ ନେଟ ଲାଭ ଗତ ବର୍ଷ ସମାନ ସମୟ ତୁଳନାରେ ୧୧.୭ ପ୍ରତଶତ ବୃଦ୍ଧି ପାଇ ୨୧,୯୩୦ କୋଟି ଟଙ୍କା ରହିଥିବା କମ୍ପାନୀ ପକ୍ଷରୁ ପ୍ରକାଶ କରାଯାଇଛି। ଅକ୍ଟୋବର ରୁ ଡିସେମ୍ବର ତ୍ରୟମାସରେ ରିଲାଏନ୍ସ ଇଣ୍ଡଷ୍ଟ୍ରିଜର ମୋଟ ରାଜସ୍ବ ବୃଦ୍ଧି ପାଇ ୨,୬୭,୧୮୬ କୋଟି କୋଟି ଟଙ୍କା ରହିଥିବା ଜଣାପଡିଛି। ସେହିଭଳି ତୃତୀୟ ତ୍ରୟମାସରେ ରିଲାଏନ୍ସ ରିଟେଲ ର ମୋଟ ରାଜସ୍ୱ ଗତ ବର୍ଷ ସମାନ ସମୟ ତୁଳନାରେ ୮.୮% ବୃଦ୍ଧି ସହିତ ୯୦,୩୩୩ କୋଟି ଟଙ୍କାରେ ପହଞ୍ଚିଛି।

ଭୁବନେଶ୍ଵର: ଇଂରାଜୀ ନୂଆବର୍ଷ ଆରମ୍ଭରୁ କମିଲା କମର୍ସିଆଲ ଗ୍ୟାସ୍ ସିଲିଣ୍ଡର ଦର। ୧୪ ଟଙ୍କା ୫୦ ପଇସା କମିଲା ୧୯ କେଜି ସିଲିଣ୍ଡର ଦର। ଦିଲ୍ଲୀରେ ନୂଆ ଦର ୧୮୦୪ ଟଙ୍କା, ପୂର୍ବରୁ ଥିଲା ୧୮୧୮.୫୦ ଟଙ୍କା। ଘରୋଇ ଗ୍ୟାସ୍ ସିଲିଣ୍ଡର ଦରରେ କୌଣସି ପରିବର୍ତ୍ତନ ହୋଇନନାହିଁ।

ସମ୍ୱଲପୁର: ସମ୍ବଲପୁର ସିଟି ଷ୍ଟେସନ ଅଞ୍ଚଳରେ ପୋଲିସ ଓ ବେଆଇନ ଗୋ ଚାଲାଣକାରୀଙ୍କ ମଧ୍ୟରେ ଗୁଳିବିନିମୟ ହୋଇଛି। ଏନ୍‌କାଉଣ୍ଟରରେ ୨ ଅପରାଧୀ ଆହତ ହୋଇଛନ୍ତି। ଦୁଇ ଅପରାଧୀଙ୍କ ଗୋଡ଼ରେ ବାଜିଛି ଗୁଳି। ଗୁରୁତର ଦୁଇ ଅପରାଧୀ ପଶ୍ଚିମବଙ୍ଗରୁ ଆସିଥିବା ସୂଚନା। ଅପରାଧୀଙ୍କୁ ବୁର୍ଲା ଡ଼ାକ୍ତରଖାନା ସ୍ଥାନାନ୍ତର କରାଯାଇଛି। ଘଟଣାସ୍ଥଳରୁ ବନ୍ଧୁକ ଓ ଗୁଳି ଜବତ କରାଯାଇଛି।

କଟକ: କଟକ ସ୍ନେହଲତା ଆପାର୍ଟମେଣ୍ଟରୁ ବାପ ଝିଅଙ୍କ ମୃତଦେହ ଉଦ୍ଧାର ହୋଇଛି। ଝିଅକୁ ମାରି ବାପା ଆତ୍ମହତ୍ୟା କରିଥିବା ସନ୍ଦେହ କରୁଛନ୍ତି ସ୍ଥାନୀୟ ଲୋକେ। ସାଇଣ୍ଟିଫିକ ଟିମ୍‌ ସହାୟତାରେ ବାଦାମବାଡ଼ି ପୋଲିସ ତଦନ୍ତ ଆରମ୍ଭ କରିଛି। ୧୫ ବର୍ଷୀୟା ଝିଅ ମାନସିକ ବିକାରଗ୍ରସ୍ତ ଥିବା ସୂଚନା। ପୂର୍ବରୁ ମୃତକଙ୍କ ପତ୍ନୀଙ୍କ ମୃତ୍ୟୁ ହୋଇସାରିଛି।

ଭୁବନେଶ୍ବର ଉପକଣ୍ଠ ବାଲିଅନ୍ତା କେନାଲ ବନ୍ଧରେ ପୋଲିସ୍ ଏନକାଉଣ୍ଟରରେ ଜଣେ ଆପାର୍ଟମେଣ୍ଟ ଲୁଟେରା ଆହତ ହୋଇଥିବା ସୂଚନା। ଭୋର୍‌ରେ ଲୁଟ୍ ଉଦ୍ୟମ ବେଳେ ଅର୍ଜୁନ ଅନାରେକୁ ଏନକାଉଣ୍ଟର ହୋଇଛି। ଅର୍ଜୁନର ବାମ ପଟ ଆଣ୍ଠୁରେ ବାଜିଛି ଗୁଳି। ଅପରାଧୀକୁ ଏମ୍ସ ସ୍ଥାନାନ୍ତର କରାଯାଇଛି। ମଧ୍ୟପ୍ରଦେଶରୁ ଆସି ରାଜଧାନୀରେ ଚଳାଇଥିଲା ଲୁଟ୍। ଅର୍ଜୁନ ସହ ଡକାୟତି ଗ୍ୟାଙ୍ଗରେ ମୋଟ ୫ ଜଣ ଥିଲେ। ଖସିଗଲେ ଗ୍ୟାଙ୍ଗର ଅନ୍ୟ ୪ ସଦସ୍ୟ।

ବଣାଇ: ସୁନ୍ଦରଗଡ଼ ଜିଲ୍ଲା ଗୁରୁଣ୍ଡିଆ ଥାନା ଜଡ଼ା ଗାଁର ଏକ ନାଳରୁ ୪ ବର୍ଷ ଝିଅର ଗଳିତ ମୃତଦେହ ଉଦ୍ଧାର କରାଯାଇଛି। ଦୁଇ ଦିନ ତଳୁ ନିଖୋଜ ଥିଲା, ଝିଅକୁ ହତ୍ୟା ପରେ ଫିଙ୍ଗିଥିବା ଅଭିଯୋଗ କରିଛନ୍ତି ପରିବାର ଲୋକେ। ହତ୍ୟା ସନ୍ଦେହରେ ପଡ଼ୋଶୀ ଦମ୍ପତି ପୋଲିସ୍ ଦ୍ଵାରା ଅଟକ ଥିବା ସୂଚନା।

ବାଲେଶ୍ଵର: ବାଲେଶ୍ଵର ସୋର ଅଞ୍ଚଳରୁ ବାଘ ଛାଲ ଜବତ କରାଯାଇଛି। ବାଘ ଛାଲ ବିକ୍ରି ପାଇଁ ଯୋଜନା ଚାଲିଥିବା ବେଳେ ୧୧ ଜଣଙ୍କୁ ଧରିଲା ବନ ବିଭାଗ। ଗିରଫ ଅଭିଯୁକ୍ତଙ୍କ ଠାରୁ ଦେଶୀ ବନ୍ଧୁକ ମଧ୍ୟ ଜବତ କରାଯାଇଛି।

ରାଉରକେଲା: ସୁନ୍ଦରଗଡ଼ ଜିଲ୍ଲା ରାଉରକେଲା ସେକ୍ଟର ୩ ରେ ଜଣେ ଯୁବକଙ୍କୁ ଗୁଳିମାଡ଼ ହୋଇଛି। ଗୁରୁତର ଅବସ୍ଥାରେ ତାଙ୍କୁ ଆଇଜିଏଚ୍ ରେ ଭର୍ତ୍ତି କରାଯାଇଛି। ଏକ ମାରାଥନ ଚାଲିଥିବା ବେଳେ ହଠାତ୍ ଗୁଳିମାଡ଼ କରି ଫେରାର୍ ହୋଇଯାଇଛନ୍ତି ଦୃର୍ବୁତ୍ତ।